Nagpatigayon sang briefing kag dry run ang Bacolod Public Order and Safety Office (POSO) personnel, Security kag Logistics Team kahapon bilang preparasyon sa State of the City Address (SOCA) ni Bacolod City Mayor Alfredo “Albee” Benitez karun sa hapon.
Sa interview sang Bombo Radyo Bacolod kay City Administrator Atty Pacifico Maghari III, ang briefing kag dry run ang ginpatigayon agud masiguro nga mangin matawhay kag wala sang problema ang SOCA sang alkalde karun alas-5:00 sa hapon.
Dugang pa ni Maghari nga madamo sang ginalauman nga guests gani kinahanglan mapreparahan ang physical arrangements sang mga pagkabutang.
Subong nga aga, nagrequest man ang mga ini sa tag-iya sang Market Bridge nga mapagamit sa ila nga mga City officials kag employees ang ila nga area agud nga magamit ang park spaces para sa pag-akumodar sang mga guests kag VIPs.
Suno diri, ang mga guests kag VIPs ang maga-abot kapin alas-3:00 sang hapon.
Gani ginahingyo sini sa tanan nga departamento sa Bacolod City Government Center nga alas-2:30 pa lamang sa hapon, tinguhaan na nga matapos sa mga transaksyon agud nga sila ang makabulig sa pagbatun sang mga bisita samtang ginahulat ang SOCA sa alas-5:00.
Ginapanawagan man sini sa mga pumuluyo nga magatransaksyon sa Bacolod City Government Center nga tempranuhan ang pagkadto samtang available man ang Express Service Office kun sa diin mahimo makapatigayon sang land tax payment kag iban pa nga mga tax payments.
Magapatigayon gihapon sang session ang Sangguniang Panlungsod bwas sa aga bangod madamo pa sila sang mga talakayon nga agenda.
170 ka mga police personnel ang igadeploy sang Bacolod City Police Office (BCPO) sa perimeter sang Bacolod City Government Center (BCGC) ground para sa State of the City Address ni Benitez.
Sa interview sang Bombo Radyo Bacolod kay BCPO Director Police Col. Noel Aliño, galakip sa 170 ang mga personnel gikan sa Bacolod Police Station 4 kag mga nagikan sa BCPO headquarters.
Samtang magaserbe naman nga crowd commander si Police Major Nestor Bacuyag, ang station commander sang Bacolod Police Station 4.
Alas-3:00 sang hapon pa lang, nakadeploy na ang mga kapulisan sa area, duha ka oras antes ang SOCA nga nakachedule nga maga-umpisa alas-5:00 sa hapon.
Magluwas sa 170 ka personnel, yara man ang Explosive Ordnance Disposal & Canine Unit agud magpatigayon sang paneling.
Sa pihak nga bahin, pasalig ni Aliño nga full force ang mga kapulisan sa Bacolod City bangod ang iban pa nga mga police stations ang ginhatagan man sang mga posting sa nagkalain-lain nga bahin sang syudad, sa gwa sang BCGC area, bilang kabahin sang anti-criminality campaign.
Luyag sang mga ini maseguro nga mapabilin ang law and order kag mangin safe kag secure ang Bacolod City.
