Ginabanta nga anum ka balay ang nahalitan sang kalayo sa nagluntad nga sunog kahapon sang hapon, Disyembre 26 sa Purok Paghidaet, Barangay 29, Bacolod City.
Sa inisyal nga impormasyon 39 ka pamilya ang apektado kun sa diin 13 ang totally damaged kag tatlo ang partially damaged samtang 21 naman ang sharers kag duha ang renters.
Sa interview sang Bombo Radyo Bacolod kay Punong Barangay Leonard Pascua sang Barangay 29, naglibot siya kag nakakuha sang inisyal nga report nga anum ka balay ang apektado sang sunog kag ginabanta lima diri ang partially damaged.
Suno kay Pascua, temporaryo anay nga ginpatulog sa Barangay Hall sang Barangay 29 ang mga apektado nga residente.
Apang sila ang ginsaylo man gilayon sa Apolinario Mabini Elementary School sa Barangay 28, bangod wala sang kuryente sa Barangay Hall matapos ginpatay ang linya bangod sa sunog.
Ginpahayag sini nga nagapreparar sila sa pagsaulog sang fiesta sang nagluntad ang insidente gani mameeting pa siya sa mga kaupdanan nila sa Barangay kun ano ang maayo nga himuon para sa fiesta bangud sa nagluntad nga insidente.
Suno kay Pascua, unahon sini ang welfare sang mga pumuluyo sang barangay nga naapektuhan sang sunog ilabi na manugbag-ong tuig.
Suno diri, indi man sini mabatas nga ang iban ang indi makaenjoy bangud sa nagluntad nga aksidente.
Ginpahayag sang punong barangay nga ginaalegar nga short circuit ang gintunaan sang kalayo kag ginlamon sang kalayo ang butane gani nagluntad ang sunog.
Nagpasalig man si Pascua nga himuon nila ang ila nga masarangan agud nga mabuligan ang mga residente nga apektado sang sunog.
