Natupok ang anum ka balay sa Purok Cabugwason, Barangay Zone 3, Cadiz City, Negros Occidental sa nagluntad nga sunog kahapon sang aga.
Sa interview sang Bombo Radyo Bacolod kay Senior Fire Officer 4 Archie Españo, acting fire marshal sang Cadiz City Fire Station, natabo ang sunog alas-10:25 sang aga kahapon, Domingo kun sa diin ang Disaster Risk Reduction Management Office sang ciudad ang nagpahibalo sa ila.
Suno kay Españo, madasig man nga nagresponde ang katapo sang Cadiz City Fire Station, apang anum ka balay ang totally damaged nga dikit-dikit kag ini ang himo sa light materials.
Ang mga balay ang nahamtang sa likod sang bagsakan sa merkado sa ciudad sang Cadiz.
Wala man sang nasamaran sa nasambit nga fire incident.
Padayon pa nga gina-imbestigaran sang mga otoridad ang gintunaan sang kalayo.
