Ginatumod pa kun sin-o ang nagapanag-iya sang anom ka box sang isda nga natumod gikan sa dynamite fishing nga ginbilin sa Negros Occidental Food Terminal sa ciudad sang Bacolod.
Sa interview sang Bombo Radyo Bacolod kay Coast Guard Commander Jansen Benjamen, Commander sang Philippine Coast Guard – Northern Negros Occidental, sila ang nakabatun sang intelligence information nga may mga isda nga nakuha gikan sa illegal dynamite fishing gikan sa Escalante City kag ideliver sa Food Terminal.
Ang PCG ang naghatag naman sang security para sa mga personnel sang Bureau of Fisheries and Aquatic Resources (BFAR) kaupod ang Bacolod Police Station 2.
Naabtan nila ang anom ka boxes sang first class nga golden trivally ukon badlon, apang kaangay nga natiktikan sang tag-iya ang otoridad gani ini ang wala na nagpakita.
Sa pagtsekyar sang fish examiner, nakita nga naglupok ang swim bladder sang mga isda, nga nagakumpirmar nga ini ang gindakop pinaagi sa illegal dynamite fishing.
Masobra isa ka kilo ang kabug-aton sang kada isda, samtang ang kada kilo sini ang mabakal sa balor nga P270 tubtob P280.
Sa kabug-usan ang unod sang anom ka box ang ginabanta nagabalor sang P50,000.
Santo sa fisheries law, ang mga makumpiskar nga isda gikan sa illegal nga pagdakop ang dapat idonar sa charitable institutions.
Ini ang ila ginhatag sa Holy Family Homes Inc. sa Barangay Cabug, Bacolod City.
