Anom ka ciudad kag isa lamang ka banwa sa probinsya sang Negros Occidental ang makapanagtag sang Performance-Based Bonus (PBB) sa ila tagsa ka Municipal ukon City employees ubong nga tuig.
Sang Huwebes, ginpagwa sang Department of the Interior and Local Government (DILG) Region 6 ang listahan sang mga eligible local government units (LGUs) sa Western Visayas nga makagrant sang Performance-Based Bonus.
Ini amo ang mga LGUs nga nakapasar sa Seal of Good Local Governance (SGLG) Assessment nakaligad nga tuig.
Ang mga nakapasar lamang sa Negros Occidental ang ginalakipan sang ciudad sang Silay, Talisay, Sagay, San Carlos, Himamaylan, Bago kag ang banwa sang Hinobaan.
Sa ginpagwa nga listahan wala nalakip ang Negros Occidental Provincial Government, gani wala man sang mabatun nga PBB ang mga capitol employees, kasubong man ang Bacolod City Government.
Suno kay Negros Occidental Provincial Administrator Atty Rayfrando Diaz, nakapasar na ang Negro Occidental Provincial Government sa SGLG Assessment subong nga 2023, gani makabatun na ang mga capitol employees sang PBB sa 2024.
Ang awarding para diri ang natalana sa Desyembre 14 sa Manila.
Sa pihak nga bahin, ginpasalig naman sini nga preparado na ang Provincial Government sa paghatag sang iban pa nga mga kaayuhan.
Ini bangod magluwas sa PBB, ang mga capitol employees ang makabatun gihapon sang iban nga benepisyo kaangay sang 13th kag 14th month pay kag Collective Negotiation Agreement (CNA) bonus kag ang Gratuity pay para a mga Contract of Service.
Nahibaluan nga sa memorandum sang Department of Budget and Management (DBM) tinalikdan nga tuig, gikan sa anay P25,000 ginpasaka sa P30,000 ang maximum nga CNA bonus nga sarang mahatag sang LGUs, depende sa availability sang budget.
Suno kay Diaz, wala pa sini maseguro kun P30,000 ang ihatag sa mga capitol employees kag ini ang nakadepende pa sa desisyon ni Governor Eugenio Jose “Bong” Lacson.
Pasalig naman sini nga nakapadala na sila sang request sa Sangguniang Panlalawigan para sa supplemental budget nga P85 million bilang CNA bonus.
