Anom ka dugang nga fatalities sa Covid-19 ang narekord sa Bacolod sang tinalikdan nga weekend.
Sa interview sang Bombo Radyo Bacolod kay Vice Mayor El Cid Familiaran, chairman sang Inter-Agency Task Force against Covid-19, ginkompirmar sini nga may anom ka nagdugang nga nagtaliwan bangud sa nasambit nga balatian.
Kaina sang aga, nagtaliwan ang 69 anyos nga iloy sang Land Tax Division employee nga nagtaliwan bangud sa Covid 19 sang tinalikdan nga semana.
Suno kay Familiaran, nalatnan sang virus ang iloy sang 48 anyos nga government employee.
Nagtaliwan naman kagab-i ang isa ka babayi nga call center agent sa syudad sang Bacolod bangud sa COVID.
Sang Sabado, nagtaliwan ang isa man ka babayi nga residente sang Barangay Singcang kag isa ka lalaki nga residente sang Barangay Banago nga lunsay positibo sa coronavirus.
Nagdugang man ang isa ka residente sang Barangay Estefania kag isa ka kapin 30 anyos nga empleyado man sang Land Tax Division.
Suno pa sa chairman sang Inter Agency Task Force sang ciudad, natalana nga magmeeting subong nga adlaw sa Mayor Bing Leonardia bangod makahalangawa na ang mga development sang coronavirus sa ciudad.
