Ginpaidalum na sa inquest proceedings sa Department of Justice (DOJ) ang anom ka mga nabilin nga suspetsado sa pagpatay kay Negros Oriental Governor Roel Degamo kahapon.
Suno kay Justice Secretary Jesus Crispin Remulla, ang isa ang makabig nga last surrenderee samtang ang lima naman ang yara na sa ila nga paghinakop sang nakaligad nga adlaw.
Pahayag ni Remulla, nga ang napulo ka mga suspetsado nga yara sa kustodiya sang National Bureau of Investigation (NBI) ang luyag nga makabahin sa Witness Protection Program (WPP).
Paathag sang Justice Secretary nga may-ara man sila sang ginaplastar nga arrangements kalakip na ang proteksyon sa ila nga mga pamilya.
Dugang pa ni Remulla nga bangod wala na sang iban pa nga pamaagi ang mga suspetsado agud mahatagan proteksyon ang ila nga mga pamilya gani sila ang nagsugot nga magwitness, samtang ang DOJ ang nakahanda naman nga maghatag proteksyon bangod aminado ini nga importante ang testimoniya sang mga suspetsado sa kaso.
Suno sa Justice Secretary, ang mga suspetsado ang interviewhon sang WPP sa Biyernes para sa proteksyon sang ila nga pamilya.
Apang indi pa maseguro ni Remulla kun ang tanan nga mga suspetsado ang mapaidalum sa witness protection bangod sa karun indi pa sila mahimo nga makabutang sang dugang nga state witness ilabi na nga ginapat-od pa ang kabug-usan nga hitabo.
Madumduman nga ginpatay si Governor Degamo kag walo ka iban pa samtang madamo naman sang nasamaran matapos ang pag-atake sang mga suspetsado sa balay sang gobernador sang Marso 4.
Pahayag sang otoridad nga isa sa mga suspetsado ang nagsurrender sang Biyernes samtang nagsungka man sa militar ang apat ka iban pa nga ginlaragway nga “major players” sa pagpatay.
Suno kay Remulla, sa 10 ka mga nadakop kag nagsungka nga suspetsado, siyam diri ang makabig “direct participants” sa assassination.
Sa karun, padayun pa nga ginapangita sang mga otoridad ang lima tubtob anom pa nga mga “direct conspirators.”
