Anom ka gina-alegar miyembro sang New People’s Army kalakip ang isa ka nagabusong ang napatay sa nagluntad nga engkwentro batok sa mga suldado sa Purok Lubi, Barangay Tabugon, Kabankalan City, Negros Occidental kagab-i.
Sa interview sang Bombo Radyo kay Brigadier General Joey Escanillas, nakabaton sila sang report nga may presensya sang armado nga mga lalaki sa Barangay Tabugon gani bilang kabahin sang ila nga mandato nga magpatigayon sang peace and development support operations, gilayon nga nagresponde ang mga miyembro sang 47th Infantry Battalion.
Samtang padulong sa lugar, nakasugata sang mga suldado ang isa ka tricycle gani gintuyo sang tropa nga usisaon ang nagasakay diri.
Apang ginpalukpan sang mga nagasakay ang mga suldado gani nagbalos ang tropa.
Suno kay Escanillas, mahimo nga gindumdom sang mga rebelde nga diutay lang ang suldado, apang may nagasunod diri nga backup teams gani sila ang napuruhan kag nagkalamatay.
Suno diri, indi niya matumod kun pila ang nagasakay sa tricycle bangud madulom apang anom lang ang body count nga ginalakipan sang apat ka mga lalaki kag duha ka mga babayi kun sa diin isa diri ang nagabusong.
Ang lugar nga ginluntaran sang engkwentro ang napalibutan sang katubuhan kag laka-laka ang mga balay.
Nakilala ang mga napatay nga sanday Alejo Delos Reyes nga kilala bilang Peter ukon Bravo, Squad Leader sang Squad 2 sa Sangay Yunit Propaganda Platoon 3; Marjon Alvior, nga kilala man bilang Kenneth, Vice Squad Leader sang Squad 2, SYP Platoon 3; Bobby Pedro, nga kilala man bilang Recoy, Vice Squad Leader sang Squad 3 sang pareho nga platoon; Mario Fajardo Mullon, nga kilala man bilang Reco ukon Goring, Medic sang Squad 1 gikan sa pareho nga platoon; Melissa Dela Pena, nga kilala man bilang Diane, ang asawa ni alias Bravo; kag isa pa nga wala pa nakilal-an.
Suno kay Escanillas, padayon ang pagkuha nila sang impormasyon agud nga makilal-an ang isa nga wala pa sa karun sang identity.
Ang Southwest Front ang nagaoperate sa Kabankalan City, banwa sang Ilog kag Cauayan kag sa Negros Oriental.
