Anom ka mga medical doctors sa ciudad sang Bacolod ang nabakunahan kadungan sang ceremonial inoculation sang COVID vaccine nagikan sa Sinovac Biotech kaina sang aga.
Pasado alas-9:00 sang maghugpa sa Bacolod-Silay Airport ang Philippine Airlines nga ginkargahan sang CoronaVac.
Ini ang ginsugata nanday Bacolod City Administrator Em Ang kag Dr. Chris Sorongon, ang deputy for medical sang Emergency Operations Center.
Kabug-usan nga 6, 270 ka doses sang bakuna ang ginpadala sang Department of Health sa Bacolod para sa Corazon Locsin Montelibano Memorial Regional Hospital, Riverside Medical Center kag iban pa nga health workers bangud 3, 135 ka tawo ang maiguan sini sa tag-duha ka dose.
Gindala ang kadamuan nga bakuna sa cold storage sang ciudad sa annex building sang Bacolod Government Center samtang ang iban ang gindala sa CLMMRH nga may kaugalingon nga cold storage facility.
Alas-10:30 sang aga, ginpatigayon ang ceremonial inoculation sa lobby sang government center.
Pito kuntani ka mga doktor ang natalana nga magpabakuna apang mataas ang blood pressure ni Dr. Michael Thomas Salvador, presidente sang Philippine College of Physicians Negros Occidental, gani anom lang ang nabakunahan kalakip si Dr. Hector Gayares, deputy for medical sang EOC.
Ang mga doktor ang naglabay sa screening kaangay sang BP check kag orientation antes pormal nga ginbakunahan kag ginpanilagan matapos matublukan kun may adverse effects.
Kada isa sa ila ang may kaugalingon man nga vaccinator gani gindungan ang duha ka recipient kag dungan man ang apat ka iban pa.
Mismo sanday Mayor Evelio Leonardia, Vice Mayor El Cid Familiaran, kag iban nga opisyales ang nagtambong sa vaccination.
Suno sa recipient nga si Dr. Hector Gayares, excited siya antes ang vaccination kag maayo lang nga nakapasar ini sa screening.
Suno kay Gayares, indi makapugong ang vaccine sa pagsulod sang virus sa lawas apang makapugong ini sang severe symptoms.
Panugyan sini sa mga mangin benepisyaryo sang bakuna sa palaabuton nga ikondisyon ang lawas bangud normal lang nga nagareact ini sa bakuna.
