Nagdangat sa anum ang nagpablotter sa Bacolod City Police Station 8 matapos ginlambatan kag ginsakit sang mga nagarally nga driver kag operator sa Old airport, Barangay Singcang Airport, Bacolod City kahapon, Mayo 20.
Sa interview sang Bombo Radyo Bacolod kay Police Major Eugene Tolentino, station commander sang Bacolod City Police Station 8, nagpahibalo man sa iya paagi sa text message si Bacolod Alliance for Commuters Operators and Drivers Inc. (BACOD) president Rudy Catedral nga magpatigayon sang peaceful rally.
Suno kay Tolentino, naghimo sila sang tikang nga sa likod nalang sang ginarallyhan maagi ang mga nagabiyahe nga mga traditional jeepneys.
Apang suno sa station commander, may mga jeep nga naglabay sa ginarallyhan bangud mahimo nga didto lang ang sarang nga maagyan pakadto sa panaugan sang ila mga pasahero.
Tubtob nga may yara na sang nagluntad nga pagpamangga kag pagpanakit sa mga drivers sang nagabiyahe nga traditional jeep.
Suno kay Tolentino, bangud sa kadamo sang mga nagarally, ang ginhimo nalang nila amo ang pagkuha sang gin-alegar ginsakit nga driver sang jeep.
Suno diri, may yara sang anum ka mga drivers nga nagpablotter kalakip na diri si Charlie Jalandoni.
Ginahulat pa sang mga kapulisan kun magapasaka ang mga ini sang complaint batok sa nagpanakit sa ila nga natumod naman sang biktima.
Sa anum nga nagpablotter pila ang tinutuyo amo ang pagparecord lamang sang mga damages sa ila jeepney units kag bangud man nga ginsakit man sila.
