Nakahunong na sa Bacolod City Police Station 6 ang tatlo ka mga persona matapos madakpan sa drug buybust operation sang City Drugs Enforcement Unit (CDEU) sa Purok Sigay, Barangay 2, Bacolod City sang Hunyo 12, alas-11:00 ang takna sang gab-i.
Sa interview sang Bombo Radyo Bacolod kay Pol. Lt. Col. Paul Vincent Pendon, pinuno sang CDEU, ginpahayag sini nga madugay na sang mga ini nga ginamonitor ang suspetsado.
Ginkilala ang mga ini kanday Norvic Nacanaynay; Efren Gonzaga kag Michael Villanueva.
Nakuha sa paghinakop sang mga ini ang siyam ka plastic sachet sang suspected shabu nga ginabanta nagabug-at sang 56 grams kag may estimated market value nga P616,000.
Samtang, dakop man ang duha ka mga persona sa seperado nga operasyon nga ginpatigayon man sang CDEU sa atubang sang Klausi Tapsilogan, Galo-Lopez Jaena St., Brgy. 23, Bacolod City.
Ginkilala ang mga suspetsado kanday Editha Rose Sepe, 37 anyos kag residente sang Prk Chereza 1, Brgy. 27 kag Mariel Salmingo, 22-anyos.
Nakuha sa paghinakop sang mga ini ang tatlo ka dalagko nga sachet sang suspected shabu nga ginabanta naga bug-at sang 5 grams kag may estimated street value nga P40,000.
Nakatalana naman ang mga ini nga pasakaan sang kaso nga pagbayolar sang RA 9165 ukon Comprehensive Drugs Act of 2002.
Dakop naman ang isa ka miyembro sang Divinagracia drug group sa joint buybust operation sang Philippine Drug Enforcement Agency (PDEA) Negros; Iloilo Provincial Office kag Silay City Police Station sa Purok Masinadyahon, Brgy. Guinhalaran, Silay City.
Sa interview sang Bombo Radyo Bacolod kay PDEA Negros Head Nicholas Gomez, ginpahayag sini nga madugay na sang mga ini ginasurveillance ang suspetsado antes pa man ini ang madakpan.
Ginkilala ang suspetsado kay Andrew Gray Pada-on,30 anyos, pamilyado kag residente sang Victorias City, Negros Occidental.
Suno kay Gomez si Padaon ang number 1 sa listahan sang mga ini kag pinaka-aktibo nga miyembro sang Divinagracia drug group.
Nakuha sa paghinakop sini ang two pieces sang heat sealed transparent sachet nga may unod nga suspected shabu nga ginabanta nagabug-at sang 15 grams kag may DDB value nga Php 102,000; 90 ka panid sang 500 peso bill bilang buybust money, dugang nga Php 500 nga boodle money, drug paraphernalias kag isa ka unit sang cellphone.
Nakahunong sa karun sa Silay City Police Station ang suspetsado kag nakatalana nga pasakaan sang kaso sa pagbayolar sang Section 5 kag 11 sang RA 9165 ukon Comprehensive Drugs Act of 2002.
