Gindismiss sa serbisyo ang anom ka mga pulis sa banwa sang Moises Padilla diri sa Negros Occidental nga nagpatigayon sang checkpoint operation sang Disyembre 19 tuig 2017 kun sa diin nadakpan ang sadto bise alkalde kag subong alkalde nga si Ella Celestina Garcia-Yulo.
Ini ang desisyon sang National Police Commission sa kaso nga grave misconduct and grave irregularities in the peformance of duty nga ginpasaka mismo sang alkalde kag sang iya bana nga si Felix Mathias Yulo III batok kanday Police Captain Allan Reloj kag lima ka mga kaupod nga sanday Police Master Sgt. Ricardo Dingcong Jr., Police Corporal Nobel Perante, Police Corporal Felis Pesales Jr., Patrolman Michael Mondido kag Patrolman Darryl Dormido.
Ang nasambit nga checkpoint ang ginpatigayon sa Barangay Crossing Magallon, alas-6:00 sang gab-i.
Ginpagwa sang mga pulis ang sadto bise alkalde sa Mitsubishi Strada.
Suno sa mga pulis, nakita nila sa plainview ang caliber .45 pistol nga nabutang sa tupad sang iya bana kag sang gin-usisa, nakuha pa gid ang duha ka hand grenade, duha ka sachets sang suspected shabu kag tatlo ka caliber .45 pistol.
Ginpanindugan sang opisyal nga gintamnan sang ebidensya ang ila salakyan.
Ang alkalde ang nakagwa sa prisuhan matapos nga nagpyansa sa kaso nga illegal possession of explosives.
Sa desisyon nga ginpirmahan ni DILG Secretary Eduardo Año, ginsentensyahan ang anom ka mga pulis sang dismissal sa serbisyo nga may accessory penalties nga cancellation sang police eligibilities, forfeiture sang retirement benefits magluwas sa accrued leave credits kag perpetual disqualification from holding public office.
