Anom ka mga sakada nga nag-abot sa Negros Occidental ang nagpositibo sa coronavirus disease.
Sa interview sang Bombo Radyo kay Dr. Zeaphard Gerhard Caelian, commander sang Provincial Incident Management Team, ginpahayag sini nga kabug-usan 4,000 tubtob 5,000 ka mga migratory workers nagikan sa probinsya sang Antique kag Negros Oriental ang ginalauman nga magsulod sa Negros Occidental agud mag-ubra sa nagkalain-lain nga mga kampo sa probinsya kadungan sang milling season sang tubo.
Suno kay Caelian, sang Oktubre 9, may 300 ka mga sakada nagikan sa Antique ang nagsulod sa probinsya kag sang Oct 11, nadugangan ini sang 43.
Suno sa iya, halin sa Antique, ila ginapaproseso ang mga ini sang travel authority, health certificate kag gina-issuehan sang notice of acceptance.
Pagsulod sa probinsya, ginakuhaan ang mga ini sang swab test kag ginasalo sang mga contractors kag hacienda agud ipaidalum sa isolation tubtob magwa ang negatibo nga resulta sang RT-PCR test.
Kun negatibo ang mga sakada sa virus, igadeploy na ang mga ini sa nagkalain-lain nga kampo kun sa diin sila magaubra.
