Tuman ang kalipay sang anom ka mga tagdaog sa ikalima nga market draw sang Enhanced Swerte sa Palengke sa Silay City Public Market kaina sang aga kadungan sang gilayon nga pagbaton sang ila nga premyo.
Ang maswerte nga mga winners sang P500 cash kag P500 nga balor sang gift pack amo sanday Roselyn Dellomo sang Barangay 35, Bacolod; Alicia Gloriana sang Barangay Zone 5, Silay City; Gina Tuya sang Silay Public Market; Amy Pubar sang Hacienda Puyas Dos, Silay City; Maria Norie Rubi sang Sitio Paradise, Silay City; kag Marelia Roselio sang Freedom Boulevard, Barangay Mambulac, Silay City.
Suno kay Nanay Marelia Roselio, tuman ang iya nga kalipay nga nagabutan ang iya nga entry.
Suno sa 65 anyos nga lola, tuman ang iya pasalamat sa P500 bangud dako na ang mabulig sini sa ila nga kinahanglanon sa sulod sang balay ilabi na nga tiange ang iya palangabuhian.
Ang cash nga iya nadag-an ang ibakal niya sang bugas gani nagpangagda ini sa mga tagpalamati nga magpasakop man agud makaangkon sang tsansa nga magdaog.
