Pasakaan sang kaso ang anum ka mga katapo sang transport group matapos ang nagtuga sang tensyon samtang nagapatigayon sang rally protesta sa atubang sang isa ka hotel sa bahin sang dalan Lacson, pasado las-11, Miyerkules, Setyembre 18.
Gin-aresto ang apat ka mga transport leaders nga wala nagsunod sa dispersal order sang Bacolod City Police Office.
Kaina sang aga nagpatigayon sang rally ang transport group nga Bacolod Alliance for Commuters, Operators and Drivers Incorporated (BACOD), Kabakod Negros Transport Coalition Incorporated (KNETCO), kag United Negros Drivers and Operators Center (UNDOC).
Sa interview kay Police Col. Joeresty Coronica, City Director sang Bacolod City Police Office, mapasaka ang BCPO sang kaso batok sa mga ini bangud sila ang madugay naman nga ginapasensyahan sang mga kapulisan.
Suno kay Coronica, naghatag na sila sang warning kag ang freedom of expression nga ginapractice sang mga nagarally ang indi na amo kag may yara ini sang limitasyon.
Suno sa City Director, may yara sang Batas Pambansa No. 880 kun sa diin nakasaad nga kun luyag nga magpatigayon sang rally ukon protesta, dapat magsecure sang permit kun ini ang patigayunon sa indi designated nga freedom park.
Antes pa man magpatigayon sang pwersa nga pagpahalin ang mga kapulisan sa amo nga grupo, naghatag pa sang abiso ang mga otoridad sa mga ini.
Wala naman ang mga ini naghalin sang malinong sabaylo nageskandalo pa sa pribado nga propedad sang isa ka hotel.
Dugang pa sini nga may Police pa nga nasamaran bangud sa pagpamato sang mga nagrally nga katapo sang transport group.
Ginpahayag man sini nga BCPO Director nga “We are government of laws but not of men”.// Nahunong sa karun sa Bacolod City Police Station 2 ang mga nagkaladakpan nga katapo sang transport group.
