Dako nga bugal para sa Provincial Tourism Office sang Negros Occidental nga anom sa ginkilala nga Top 10 Tourist Destination para sa day visitors ang nagikan sa probinsya.
Suno kay Cherryl Decena, officer-in-charge sa Provincial Tourism Office, sila ang nagpatigayon sang damlag lang sang third quarter tourism officers meeting nga gintambungan sang tanan nga City kag Municipal officers sa probinsya kun sa diin gin-update sang mga ini ang latest statistics.
Paathag ni Decena nga sa bilog nga Western Visayas sa pinakamadamo nga day visitors, anom gikan sa 10 nga yara sa listahan ang gikan sa Negros Occidental.
Nagapati ini nga dako ang nangin kontribusyon diri sang local government unit (LGU).
Paathag ni Decena nga madamo sang mga tourist destination sa Negros Occidental ang nalakip sa listahan apang Top 10 lang ang ginpagwa kun sa diin number one ang Sipaway Beach Resort sa San Carlos City, Negros Occidental; number 2 Bantug Lake Ranch Place sa syudad sang Bacolod; number 4 Campuestohan Highland Resort sa Talisay City, number 6, Otirasor Beach Resort, Himamaylan City kag number 9, The Ruins syudad sang Talisay.
Pahanumdom sini sa mga luyag magbisita sa probinsya nga magpreparar sang vaccination cards kag ID nga mahimo pangitaon kasubong man ang pre-registration ilabi na nga ginalimitahan pa ang porsyento sang mapasulod nga mga turista sa mga tourist areas.
Target sang Negros Occidental nga makapasulod sang tunga sa milyon nga tourist para sa 2022, kun sa diin gamay nalang ang kinahanglan nga lagson.
Nagapati naman si Decena nga sa pagpatigayon nila sang pila ka mga aktibidad, ila malapawan ang nasambit nga target tourist arrivals.
Aminado ini nga madamo sang mga matahom nga mga tourist destination sa probinsya apang dako nga factor sa pagdamo sang nagasulod nga turista ang koordinasyon sa Tourism Office, LGU kag mga stakeholders.
Bangod sa madamo ang nagsarado nga mga resorts kag iban pa nga tourism destination sa probinsya tuga sang pandemic, madamo man sang nadulaan sang trabaho.
Bangod sa kakulang sang mga trabahante, ang Tourism Office sa Negros Occidental kag Western Visayas ang nagapatigayon man sang capacity building training kag mga basic courses kaangay sang house keeping, tourism statistics and collecting data kasubong man ang tour guiding.
Pinaagi sini, ila maseguro nga sa pagbukas sang tourism industry, ma-meet man sang probinsya ang ekspektasyon sang mga turista.
Paathag ni Decena nga papel sang DOT nga ma-avail sang tanan nga tourism establishments ang trainings.
Sa pihak nga bahin, ginapanugyan man ni Decena nga magpa-accredit ang mga bag-o nga bukas nga mga cafe ukon coffe shops sa DOT agud nga makasunod sa guidelines sang ahensya.
Ginapakamaayo sini nga halos 90 porsyento na sang mga nagsarado nga establishimento nga nagsarado sang pandemic ang nakabalik na sa operasyon, kag ang nabilin nga wala pa nagbukas ang may mga kahalitan tuga sang bagyong Odette kag iban pa nga structural problems.
