Patay ang lima ka tuig nga lalaki matapos maulamid sa pagkasunog sang balay sang iya nga lola sa ciudad sang Bacolod kaina sang kaagahon.
Pasado alas-5:00 sang kaagahon sang nagluntad ang sunog sa Purok Sigay, Barangay 2 kag natabuan nga nagatulog ang biktima nga si Rayniel Macapal sa second floor sang balay ni Belinda Cuadra nga ginsuguran sang kalayo.
Suno kay Bacolod fire marshal Fire Chief Inspector Publio Ploteña, ginbutong pa sang iya pakaisa ang biktima agud nga makapanaog kag sila ang naglabay sa bintana apang bangud bangud sa kadamol sang aso, nabuy-an niya ini kag nabilin sa kwarto.
Bangud dako na ang kalayo kag may ginakungkong man ang pakaisa nga isa pa gid ka bata, wala na niya nabalikan ang biktima rason nga napatay.
Ang biktima ang ginbilin sang iya nga iloy sa iya nga lola.
Sa kabug-usan, apat ka mga balay ang apektado sang sunog kun sa diin totally-burned ang balay ni Cuadra samtang partially-burned naman ang tatlo ka iban pa.
Suno kay Ploteña, ginatumod pa sang Bureau of Fire Protection kun ano ang ginhalinan sang kalayo.
