Natumod nga involved sa pila ka mga shooting incidents sa Bacolod City ang motorcycle driver nga nadakpan nga may halos P1.5 million nga balor sang suspected shabu kag granada sa checkpoint sa San Juan Street, Barangay 6, Bacolod City kagabi.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, ginpasanyog pa nila ang ginapatigayon nga regular checkpoint kagab-i bangod Grand Opening sang Masskara Festival.
Samtang nagabantay ang mga otoridad, hinali nga naggwa sa isa ka corner ang suspect nga ginkilala nga si Anthony Cuadra, 35 anyos, single, residente sang Purok Sigay, Barangay 2, Bacolod City.
Nakibot pa ini sang makita nga madamo sang mga kapulisan kag nagtuyo nga magpalagyo, apang bangod madamo sang personnel kagab-i kalakip ang Bacolod City Mobile Force Company, nabalabagan si Cuadra.
Suno kay Tolentino, wala sang helmet ang suspect, kag wala man sang plaka ang motorsiklo, apang sa masami ang mga may kaangay nga violations ang nagapadakop na lamang kag nagabayad sang penalty.
Sa baylo, si Cuadra ang kaangay nga nagasala-sala kag nagkalahulog sini ang mga sachet sang suspected shabu gikan sa bulsa sang iya jacket.
Narecover kay Cuadra ang balor P1,496,000 nga suspected shabu nga ginabanta nagabug-at sang 250 grams.
Sa pagtsekyar sa tool box sang motorsiklo, didto nakita nga siya ang may-ara man sang granada.
Ginalantaw ni Tolentino nga bag-o lang natapos sa transaksyon si Cuadra gani wala pagid nasecure ang mga suspected shabu, samtang ang granada ang mahimo ginagamit sini nga pamahog sa iya mga kliyente.
Sa padayun nga imbestigasyon, may duha ka Police Stations nga nagkumpirmar nga nalink ang pangalan ni Cuadra sa mga shooting incidents nakaligad kag subong nga tuig, apang wala gid sang may nagpasaka sang kaso.
Kumpirmado man nga himata ang suspect ni Boy Cuadra, ang anay lider sang Cuadra Drug Group.
