Nagapati ang isa ka anti-corruption advocate sa ciudad sang Bacolod nga ginapakita lang ni President Ferdinand “Bongbong” Marcos Jr. kun ano ang direksyon sang iya administrasyon paagi sa pagbungkag sang Presidential Anti-Corruption Commission (PACC) nga gintukod sadto ni anay Presidente Rodrigo Duterte.
Sa interview sang Bombo Radyo kay former Bacolod City Councilor Archie Baribar, ang Executive Order No. 1 nga gin-issue nio Marcos sang nagpungko ini sa pwesto sang Hunyo 30 ang nagapatimaan nga wala nagapakita ang presidente sang importansya sang anti-corruption campaign.
Suno kay Atty. Baribar, kulang ang mga ahensya sang gobyerno nga nagafunction batok sa korapsyon gani mas maayo kuntani kun nagabulig ang PACC.
Bangud sa EO ni Marcos suno kay Baribar, lauman na nga anemic ang campaign against corruption sang Marcos administration.
Nagapati ang anay konsehal nga wala sang duplication sa pagtukod sang PACC bangud nagakatabo lamang ang duplication kun duha ka ahensya ang nagauyat sang pareho nga kaso.
Apang sa bahin sang PACC, wala naman ini nagaoverlap sa function sang iban nga ahensya.
Tuman naman kalala suno kay Baribar kun PCGG ang masunod nga bungkagon ni Marcos.
Sa karon nga wala na ang PACC, ginalantaw na sang mga tawo suno sa abogado nga indi na sila makadirekta padangat sang reklamo sa opisina sang presidente kundi madiretso sa iban nga ahensya nga tested and proven naman nga indi epektibo halin sadto.
Bilang resulta, indi na makumbinsi ang mga Pilipino nga mangin vigilant sa korapsyon nga nagakatabo sa palibot.
