Nagpagwa sang report ang Negros Occidental Police Provincial Office (NOCPPO) angot sa ila nagkalain-lain nga anti-criminality operations sa sulod sang isa ka semana sa Negros Occidental.
Sa interview sang Bombo Radyo Bacolod kay Police Captain Judesses Catalogo, Public Information Officer sang NOCCPO, ginkumpiskar ang ginapatihan shabu nga nagabalor sang P491,000 kag 52 ka mga suspetsado ang gin-aresto.
Sa kampanya kontra iligal nga druga, padayon nga ginpalig-on sang Philippine National Police ang ila operasyon nga nagresulta sa pagkadakop sang mga involved sa illegal drug trade.
Samtang, sa kampanya batok sa illegal possession of firearms kag may kaangtanan sa shooting incidents ukon sa paglapas sang RA 10591, tatlo ka operasyon ang ginpatuman kun sa diin tatlo man ka suspetsado ang nadakpan kag tatlo ka armas ang kumpiskado.
Dugang pa diri, pito ka mga armas ang boluntaryo nga ginsurrender kag gin-deposito sa nagkalain-lain nga police stations sa probinsya.
Sa anti-illegal gambling operations, apat ka operasyon ang ginpatigayon, nga nagresulta sa pagkadakop sang 16 ka persona kag pagkumpiskar sang P1,987 nga bet money.
Sa bahin sang mga wanted persons, pito ka operasyon ang ginpatigayon kun sa diin pito man ka mga wanted persons ang gin-aresto.
Dugang pa, sa 22 ka operasyon batok sa mga may pending warrant of arrest, tanan nga 22 ka target ang madinalag-on nga nadakpan.
Padayon man ang kampanya kontra illegal fishing, kun sa diin siyam ka operasyon ang ginpatuman nga nagresulta sa siyam ka nadakpan.
Narekober sa operasyon ang isda nga nagabalor sang P90,875 kag fishing paraphernalia nga nagabalor sang P85,000 nga ginconfiscate bilang kabahin sang implementasyon sang local ordinances.
Ginpasiguro sang NOCPPO nga magapadayon ang ila mas hugot nga kampanya batok sa kriminalidad sa probinsya.
