Liwat naman nga nasiplatan ang pila ka mga badjao sa ciudad sang Bacolod.
Sa interview sang Bombo Radyo Bacolod Department of Social Services and Development (DSSD) Head Alma Gustilo, sa ila nga pagsurveillance, may Barangay sa sur nga bahin sang ciudad nga nagreport nga may-ara sang tatlo ka pamilya sang mga Badjao nga nagaliyong sa ciudad.
Suno kay Gustilo, ang Anti-Mendicancy Task Force ang nagakoordinar naman sa local government unit kag kapulisan sa himuon nga plano bangod ang mga ini ang dapat mapabalik sa ila nga ginhalinan.
Ini bangod sa pagpangayokayo, sa masami sila ang nagapatintero sa mga salakyan kag hinali nga nagasaka, nga tuman ka delikado.
Suno kay Gustilo, wala pa nila mapamangkot kun sa diin nagikan ang mga badjao nga yara karun sa ciudad apang sa nakaandan ang entrance kag exit point sang mga badjao ang gikan sa Dumaguete patabok sa Zamboanga.
Sa karun, ginaplanuhan pa nila ang pagsecure sang mga badjao antes ang pagbyahe papauli, bangod sa nakaligad ang mga ini ang temporaryo nga ginpatinir sa Youth Home sa Barangay Vista Alegre.
Ginapreparar naman nila ini apang may ara pa sang mga nasunugan gikan sa Barangay 7 nga yara man sa lugar kag temporaryo nga nagatinir.
Ang mga badjao ang hugot nga ginamonitor sang Anti-Mendicancy Task Force bangod indi nila luyag nga masulit ang natabo sang nakaligad kun sa diin nagtuga sa tensyon sa tunga sang Iloilo kag Bacolod City ang issue sang mga badjao.
