Tinutuyo sang Bacolod Traffic Authority Office nga magpatigayon sang “anti-smoke belching” operation sa syudad sang Bacolod upod sa Land Transportation Office (LTO) gani nagsulat ang mga ini sa pamunuan sang LTO Region 6.
Sa sulat sang BTAO kay LTO Region 6 Director Atty. Gaudioso Geduspan II, nagahingyo ini sang “Anti Smoke Belching Unit” agud nga may gamiton sa operasyon sa pagpatuman sang Republic Act 8749 ukon Philippine Clean Air Act of 1999.
Sa interview kay BTAO Deputy Head Jose Antonio “Jojo” Robello agud masunod ang Department of Environment and Natural Resources (DENR) standards para sa tanan nga sahi sang salakyan, nga paagi agud makontrolar ang kadamu-on sang mga salakyan nga nagasulod kag nagagwa sa Bacolod kag makapasiguro sang kapag-on sang mga salakyan nga nagabiyahe para sa public safety sang mga Bacolodnon.
Dugang pa sang BTAO deputy head, una nga ginakonsiderar sang BTAO ang paghinun-anon kay Councilor Claudio Jesus Raymundo “Kalaw” Puentevella, chairman sang Committee on Environment kag Councilor Al Victor Espino, chairman sang Committee on Transportation sa Sangguniang Panlungsod.
Dugang pa ni Robello nga kinahanglan nga amyendahan ang ordinansa batok sa smoke belching sa ciudad, bangud wala pa sang nabutang nga penalidad sa magalapas diri.
Paathag sini nga dapat ang law enforcement ang may ginabasehan nga layi kun may dakpon nga mga violators.
Nakita sang BTAO nga madamo sa gihapon sang mga salakyan nga nagadalagan sa ciudad nga tuman ka-itom ang aso nga nagaguwa sa ila mga tambutso.
Sa karun ginaplano ini nga mapatuman bangud madamo sang daan nga mga salakyan sa ciudad nga dapat makapasar sa inspeksyon samtang indi naman dapat mahatagan sang updated nga OR/CR ang mga salakyan nga nagabuga sang madamol kag ma-itom nga aso.
