Ginreconvene ni Bacolod City Mayor Alfredo Benitez ang Anti-Smoking Task Force nga may tinutuyo nga dakpon ang mga nagapanigarilyo sa pampubliko nga lugar sa ciudad.
Suno kay Councilor Simplicia Distrito, sang konsehal pa ang bata sini nga si Atty. Ceasar Distrito, siya ang nag-author sang ordinansa nga nagadumili sa pagpanigarilyo sa pampubliko nga lugar apang amat-amat ini nga nadula sang nag-COVID pandemic.
Suno kay Councilor Simple, nagapasalamat ini sa alkalde bangud maimplementar na sa karun ang ordinansa.
Ang madakpan sang task force nga nagabayolar ang magabayad sang multa nga P500 sa first offense; P1,000 sa second offense; kag P2,500 kag 30 ka adlaw nga pagkapriso sa third offense.
Suno kay Distrito, dako ini nga bulig agud mangin aware ang mga pumuluyo nga delikado sa ikaayong lawas ang pagpanigarilyo ilabi na para sa mga nagahaklo sini ukon mga second hand smokers.
