Ginakalipay sang 3rd Infantry Division sang Philippine Army ang House Bill No. 6875 ukon Anti-Terrorism Bill.
Sa interview sang Bombo Radyo Bacolod kay 3rd Infantry Division Spokesperson Captain Cenon Pancito III, makabig nga welcome development ang bisan ano nga makabulig sa ubra sang Armed Forces of the Philippines bangud sila ang in-charge sa security kag peace and order sa pungsod.
Suno kay Pancito, ang nasambit nga hagna ang makabulig sa security forces kag mas mapadasig kag mapatadlong ang ila nga ubra ilabi na nga ang terorismo ang napaidalom sa ila nga mandate.
Aminado man ini nga may mga provision sa nauna nga layi nga indi sila pabor apang bangud sa hagna, mas nangin klaro kun ano ang ila dapat himuon.
Nagapati man ini nga bangud diri, mas mapadasig ang pag-angkon sang peace and order sa pungsod.
Suno sa tagpamaba, luyag sang gobyerno ang progresso kag development apang nagaupang diri ang gyera, insurhensya kag terorista sa Pilipinas gani ginakalipay sini nga may bag-o nanaman nga avenue agud masolbar ang problema diri.
Nagpanghangkat man ini sa mga wala nagakompormi sa hagna nga hatagan ini sang chansa.
Gindugang man ni Pancito nga wala sang dapat nga kahadlukan ang mga pumuluyo kag makasalig ang mga ini nga ang ila iimplementar nga layi ang tuhoy lang gid sa pagpauntat sang terorismo.
