(UPDATE)
BACOLOD – Anum ang pilason kalakip na ang duha ka pulis sa natabo nga shootout sa tunga sang mga kapulisan kag gun for hire group sa Cauayan, Negros Occidental kaina sang kaagahon.
Sa exclusive interview sang Bombo Rado Bacolod, ginpahayag ni Police Inspector Charmae De Paz, spokesperson sang Negros Occidental Police Provincial Office (NOPPO), nga ginserbe sang mga pulis ang search warrant sa mga miyembro ng Galendez gun for hire group sa Sitio Matab-ang, Brgy. Masaling, Cauayan.
Ginpangunahan ini ni Police Senior Superintendent Rodolfo Castil Jr., Provincial Director sang NOPPO kag sa bulig man sang Criminal Investigation and Detection Group (CIDG) Region-6 sa pagpamuno ni Police Chief Inspector Tobera.
Ginkilala ang mga subject nga sanday Rodel Taquiso kag Salem Teodulo nga ginakilala nga national wanted persons.
Apang sang matukiban nila ang presensya sang mga pulis, nagpalupok ang mga subject kag nagbalos man ang mga pulis nga nagresulta sang pagkapilas sang duha ka grupo.
Kalakip sa mga napilasan ang mga miyembro sang Provincial Mobile Force nga sanday PO3 Reynaldo Bodien nga may pilas sa iya bibig kag PO3 Rolando Prieto nga may pilas sa tiil.
Magluwas sa ila, pilason man ang apat ka mga kaupdanan sang mga subjects sa compound.
Naaresto naman sang otoridad sanday Taquiso kag Teodulo kalakip ang apat nila ka mga kaupdanan nga ginkilala nga sanday Cris Jun Taquiso, 31-anyos sang nasambit nga barangay, Rayming Melocoton, 29-anyos sang Brgy. Lantad, Silay City, Romy Taquiso, 35-anyos sang Brgy. Caliling, Cauayan kag si Lucino Demo, 50-anyos sang Brgy. Caliling, Cauayan.
Narekober sang mga pulis ang tatlo ka shotguns, isa ka .38 caliber revolver, isa ka .45 caliber pistol, granada kag madamo nga mga bala.
Sa subong, yara sa kustodiya sang CIDG-Negros Occidental ang anum ka mga arestado samtang nagapadayon ang imbestigasyon.
