Ginpahayag sang tiya sang amay sang pito ka bulan nga lapsag nga lalaki nga napatay matapos mahulog sa container nga may tubig sa Barangay Sum-ag, Bacolod City nga wala sang may luyag nga matabo ang insidente.
Sa interview sang Bombo Radyo Bacolod kay Noemi Rosquillo, sa nakaandan nagabugtaw ang baby mga alas 5:00 ang takna sang kaagahon kag nagahibi sang todo.
Suno kay Rosquillo, natingala ini nga kahapon wala ini nakahibi apang nakabati lang ini sang gamay nga tingog nga nabatian man sang ila amay apang wala man ginsapak.
Ginalantaw nila nga amo na ang tion nga nahulog na sa container ang bata.
Suno diri ang iloy sang bata ang tuman ang kasubo sa natabo sa lapsag kag sa karun indi pa maestorya sang maayo.
Masami nga ginabutang sang ginikanan ang bata sa tunga sang mga ini sa tion nga magtulog agud nga mabatyagan sa mga ini kun magbugtaw, apang ginalantaw nga sa tuman nga kakapoy wala na ang mga ini makabatyag nga nagkamang ang bata kag nahulog sa container nga may tubig.
Ang container nga may tubig ang ginagamit sang ginakanan sang lapsag agud nga ihugas diri sa tion nga magpangihi.
Madumduman nga kahapon, ginpahayag sang isa ka residente nga nagabyahe ang mga ini sakay sa ambulansya padulong sa evacuation center sang nalabyan nila ang isa ka iloy nga nagapangayo sang bulig matapos malumos sa balde ang bata sini.
Ila ginkuha ang bata kag gintinguhaan nga buligan apang samtang nagabyahe napatay ang makina sang salakyan kag amo man nga ginbawian sang kabuhi ang lapsag.
