Anum ka Local Government Units sa probinsya sang Negros Occidental ang apektado sang minor explosive eruption nga nagluntad sa bulkan Kanlaon kaina sang aga.
Suno kay Irene Belle Ploteña, pinuno sang Negros Occidental Provincial Disaster Risk Reduction and Management Office, sa ciudad sang La Carlota, sa 14 ka brgy, 12 tanan ang apektado sang ashfall, ini ang ginalakipan sang Brgy Ara-al, Yubo, San Miguel, Haguimit, La Granja, Cubay, Balabag, Nagasi, RSB, kag Poblacion 1,2,3.
Sa banwa sang La Castellana, duha ka brgy ang apektado kalakip na ang brgy Sag-ang nga nakaeksperyensya sang ashfall kag baho sang asupre.
Sa banwa sang Hinigaran, 24 ka brgy naeksperyensyahan ang light ashfall.
Sa banwa sang Pontevedra may 17 ka brgy ang nareport nga may ashfall nga amo ang brgy Zamora, Gomez, Mabini, Buenavista Rizal, Burgos, Antipolo, San Juan, Poblacion 1,2,3, kag Recreo, Canroma, Gibong, Miranda, San Isidro, kag M.H. Del Pilar.
Samtang sa banwa naman sang San Enrique apektado sang ashfall ang Brgy Tibsok kag Baliwagan.
Samtang ang ciudad sang Bago, apektado ang brgy Mailum, Ilijan, kag Binubohan.
Suspendido man ang klase sa banwa sang La Castellana kag Pontevedra kag ciudad sang La Carlota kag Bago sa tanan nga lebel.
Gin-athag man ni Ploteña nga ang puti nga aso nga nakit-an sa baba sang bulkan ang tuga sang Pyroclastic density currents (PDCs) kun sa diin ang mainit nga bato nga nagtabog ang nagtupa sa mga hilamon ukon kahoy kag nagtuga sang aso.
Sa karun, wala pa man sang additonal nga evacuees.
