Priso ang anum ka mga persona matapos madakpan sang Philippine Drug Enforcement Agency Region 6 nga nagasuyop sa isa ka puluy-an sa Purok Sarisa 2, Brgy. 27, Bacolod City kahapon
Sa interview sang Bombo Radyo kay Agent Bamboo, ginpahayag sini nga masobra isa ka bulan na nila nga ginasurveilance ang subject person nga si Karen Ducay, 36 anyos, street level pusher kag tag-iya sang balay nga ginhimo drug den.
Suno kay Agent Bamboo, sang ila nakumpirmar nga may nagapatigayon sang illegal nga buluhaton sa nasambit nga puluy-an, gilayon sila nga nagkuha sang warrant of arrest sa korte kag ini ang ginserbi kahapon.
Lakip sa mga nagkaladakpan sanday Ronald Torres, 39 anyos; Jojemar Bebic, 20 anyos; Glenn Magbanua, 53 anyos; Caroline Delosario, 37 anyos; kag May Rose Molina, 33 anyos.
Nakuha sa ila paghinakop ang 15 ka gramo sang suspected shabu nga ginabanta nagabalor P102,000; lima ka mga lighters; tatlo ka improvised tooter; isa ka red canister; kag P500 nga buybust money.
Nahibaluan nga nagapabayad si Ducay sang P20 sa mga luyag magsuyop sa shabu sa iya balay.
Suno kay Agent Bamboo, ginaverify pa sang PDEA kun diin ini nagakuha sang supply sang illegal nga druga.
Sa karun, nakahunong ang mga suspetsado kag nakatalana nga pasakaan sang kaso nga pagbayolar sa R.A. 9165 ukon Comprehensive Dangerous Drugs Act of 2002.
