Estable na ang kondisyon sang anum ka lalaki nga nakuryente sa Bacolod-Negros Occidental Economic Highway (BANOCEH) sa Brgy Sum-ag, ciudad sang Bacolod, kahapon, kapin alas- 4:33 sang hapon.
Ang mga biktima ang ginkilala nga sanday Aaron, 47 anyos, kasado, resident sang Zone 12, Brgy. Handumanan, Bacolod City; Reymark, 27 anyos, single, residente sang Bag- o Dalan, Brgy. Cabug, Bacolod City; Alden, 24 anyos, single, residente sang Prk. Tumpok, Brgy. Blumentritt, Murcia; Roland, 34 anyos, kasado, residente sang Zone 12, Handumanan, Bacolod City; Joseph, 34 anyos, kasado,residente sang Prk. Star Apple, Brgy. Lumapaw, Canlaon City; kag Arnelo, 24 anyos, single, resident sang Brgy. Sura, Cauayan.
Sa interview sang Bombo Radyo kay Police Captain Andy Ofalia, station commander sang Bacolod Police Station 9, naga-install ang anum ka biktima sang poste sang solar light sa center island apang sang ila ini ginpatindog gamit ang backhoe, aksidente nga natandog ang linya sang kuryente.
Nagtabog ang mga biktima nga nag-agom sang mga pilas sa ila mga lawas.
Gilayon man nga gindala sa South Bacolod General Hospital ang anum ka lalaki agud mahatagan sang nagakaigo nga pagbulong.
