Isa na lang ka bangkay sa pito ka New Peoples Army nga napatay sa engkwentro nga nagluntad sa Brgy Tapi, ciudad sang Kabankalan, Negros Occidental, sang Dominggo, ang wala pa naclaim sang pamilya.
Ang mga napatay ang ginkilala nga sanday Jhonrey Mejares, alias “Jai/JR”, political instructor ukon political guide; Glendel Tinio Mejares, alias “Ayin”, isa ka medical officer; Charity Amacan, alias ” Cha/Leah”, isa ka Squad leader kag anay secretary sang South East Front, Reniel Locsin Cello, alias “Kumpol/Adie”, isa ka squad leader; kag si Mary Jane Magquilat, alias ” Shonie/Chinchin/Shedi”, vice squad leader kag asawa ni alyas Kumpol; Jhon Isidor Supelanas, alias “Dalia”, political instructor; kag amo si alias “Pitong”, medical officer.
Sa interview sang Bombo Radyo Bacolod kay Brig. Gen. Joey Escanillas, commander sang 302nd Infantry Brigade sang Philippine Army, kahapon naclaim ang bangkay nanday Charity Amacan, Reniel Locsin Cello, Mary Jane Magquilat, Jhon Isidor Supelanas samtang ginaprocess naman sa karun ang dokumento sa pagclaim sa bangkay sang mag-asawa nga sanday Jhonrey Mejares kag Glendel Tinio Mejares.
Sa karun isa na lang ang wala naclaim nga amo si alias Pitong nga ginalantaw naga-edad sang 30 anyos pataas.
Ginapanawagan kun sin-o man ang may himata nga nagsulod sa makawala nga grupo nga luyag magkilala sa bangkay mahimo lang magpalapit sa otoridad apang kun wala sang may magclaim, ini ang ipalubong na lang sang LGU.
