Ginkumpirmar sang Punong Barangay sang Barangay Singcang Airport sa ciudad sang Bacolod nga ginlockdown na ang isa ka apartment kag anom ka mga balay sa Purok Magayon sa amo nga barangay.
Ini ang kasunod sang pagpositibo sang isa ka 25-anyos nga residente sang Mandaue, Cebu kag isa ka Authorized Person Outside Residence (APOR) bangud nagatrabaho ini sa isa ka telecommunications company sa ciudad sang Bacolod.
Sa interview sang Bombo Radyo Bacolod kay Punong Barangay Rosinie Distrito, ginpahayag sini nga 20 ka mga hulot sa apartment ng okupado kag anom ka mga balay nga may tag-duha kag tag-tatlo nga pamilya ang ginlockdown kag ginpaidalom na swab testing kahapon.
Suno kay Distrito, isa palang ka semana nga nagatinir sa amo nga apartment ang pasyente apang madugay na diri nagatinir ang iban nga mga empleyado sang iya nga kompaniya.
Ginkumpirmar man sang punong barangay nga padayon pa ang ila nga contact tracing bangud nga nakabakal sang pagkaon ang amo nga pasyente sa gwa sang iya nga apartment.
Ginpasiguro naman ni Distrito nga hatagan nila sang ayuda ang mga nalockdown.// Nagpangabay man ini sa mga tag-iya sang boarding houses ukon apartment nga indi basta-basta magpatinir sang indi nila kilala ilabi na ang mga may yara sang travel history.
