Ginkumpirmar ni Bacolod City Administrator Em Ang nga nagnegatibo sa repeat test ang apat ka pinakaulihi nga mga Bacolodnon nga nagpositibo sa Delta variant sang COVID-19.
Sa interview sang Bombo Radyo kay Ang, ginpahayag sini nga nagwa na ang resulta sang repeat test nga ginpatigayon sang Agosto 28 kag lunsay nagnegatibo sa virus ang 55-anyos nga taga Barangay Villamonte; 68-anyos nga residente sang Singcang Airport; 25-anyos nga taga Barangay Taculing; kag 31-anyos nga residente sang Barangay Vista Alegre.
Suno diri, nagnegatibo man ang mga close contacts sang mga ini gani wala sang dapat nga kahangaw-an.
Sa karun may yara sang napulo ka mga Delta variant cases ang ciudad kun sa diin siyam ang nagnegatibo sa repeat test.
Ang isa nga nagpositibo ang isa ka 63-anyos nga residente sang Barangay Banago apang bangud nga madugay na, ginakonsiderar na ini nga recovered.
Nagapadayon naman ang vaccination sa ciudad kag kagab-i, nagsugod na ang 24-hour COVID vaccination sa 2nd floor sang Jollibee Burgos-Gatuslao.
Ginlunsyar man kahapon ang ikatatlo nga vaccination taxi sang ciudad.
