Tatlo ang totally kag isa ang partially damaged nga balay sa nagluntad nga sunog sa Purok Bayanihan, Barangay Taculing Bacolod City kapin ala-1:30 kaina sang kaagahon.
Sa interview sang Bombo Radyo Bacolod sa mga kaingod, ang kalayo ang nag-umpisa sa balay ni Ailene Pacheco.
Pahayag sang duha ka kaingod nga si Ailene ang naga-upod sa bana sini nga nagatrabaho bilang security, samtang ang ila bata nga si June Pacheco, nga masami hubog, ang nakita kapin ala-1:00 sang kaagahon nga nagagwa-sulod sa balay.
Magluwas sa balay sang pamilya Pacheco, natupok man ang katupad nga balay sang mag-utod nga sanday Aladin kag Al-al Bantigue.
Isa sa ginalantaw sang mga ini nga mahimo nagapanigarilyo si June kag ini ang ginbilin-bilin nga nagresulta sa sunog.
Wala man gilayon nakatawag sang bombero bangod sa pagpinsar nga masarangan tapnaon ang kalayo apang sa sulod lamang sang 20 tubtob 30 minutos, madasig nga ginlamon sang kalayo ang tatlo ka balay.
Suno sa mga kaingod, ginpukaw lang sila sang mga kabataan nga may-ara na sang sunog, kag nalab-ot na ang ila kwarto, gani gilayon na lamang sila nga naggwa.
Pipila ka panapton lamang ang ila nadala sa paggwa sa balay.
Wala sang nadulaan sang kabuhi sa sunog apang nakaangkon sang pilas sa butkon kag agtang si Aladin samtang ini ang nagapangsalbar sang kagamitan sa ila balay.
Patay man sa sunog ang ido sang mga ini nga Japanese spitz kag P25,000 nga cash.
