Nagdangat sa P22,800 ang ginabanta nga balor sang kahalitan nga ginbilin sang sunog nga nagluntad sa Villarante Village, Barangay 1, San Carlos City, Negros Occidental kahapon sang aga, Mayo 4, 2026.
Sa interview sang Bombo Radyo Bacolod kay Fire Officer 1 Martin Hibionada, Chief Investigation Unit head sang San Carlos City Fire Station, apat ka balay ang nasunog kun sa diin duha ang totally kag duha man ang partially burnt.
Suno kay Hibionada, pader lamang ang nagaseparar sa mga balay.
Suno diri sa ila imbestigasyon sa napabay-an nga wall fan ang ginhalinan sang kalayo sa nagluntad nga sunog.
Ang tag-iya sang wall fan ang nagwa lamang sang makadali apang pagbalik sini sa ila balay ang nagakasunog na.
Nagpanugyan si Hibionada sa mga pumuluyo nga indi pagpabay-an ang mga appliances nga naga-andar ilabi na nga tuman ka init ang panahon agud nga malikawan ang sunog.
