Apat ka medical doctors sa syudad sang Bacolod ang natigayon nga mabakunahan sang AstraZeneca vaccine sa ginpatigayon nga ceremonial vaccination sang bakuna kahapon sa lobby sang government center.
Sa interview sang Bombo Radyo kay Bacolod City Administrator Em Ang, ginpahayag nga nagapadayon na ang vaccination programa sang syudad.
Suno kay Ang, una nga COVID vaccine nga nag-abot sa syudad ang Sinovac vaccine kun sa diin gintubok sa mga healthcare workers nga naga-edad 18 yrs. old tubtob 59 yrs. old santo sa age requirement sang bakuna.
Samtang ang AstraZeneca vaccines ang gintublok sa mga healthcare workers nga senior citizens.
Nagakalipay man ini bangud dako na nga bahin sang populasyon sang mga healthcare workers kag medical doctors sang syudad ang macovered sang bakuna agud nga may proteksyon ang mga samtang naga-atinder sa mga pasyente.
Ginatinguhaan man nga mapadasig ang pagbakuna sa madali nga panahon agud madasig man nga mabakunahan ang mga pumuluyo.
Ginkompirmar man ni Ang nga sige sige na ang vaccination program sang probinsya.
Gin-athag man sini nga gin-una nila pangbakuna ang mga hospital frontliners nga luyag nga magpabakuna santo man sa survey nga ginkuha sa ospital.
Nagpanugyan man ini sa mga pumuluyo nga magpabakuna bangud wala man sila sang kahangaw-an kay ang nagpabakuna ang mga prominente nga doctor kag mga healthcare practitioners kag wala man sang recorded nga adverse effect.
Samtang, nag-abot naman kahapon sang hapon sa Bredco port ang 840 vials sang Coronavac, ang vaccine nga ginhimo sang Chinese company Sinovac nga ginpain para sa syudad sang Bacolod.
