Nadugangan pa ang numero sang mga rebelde nga nagkalamatay sa asud-asod nga mga engkwentro sa isla sang Negros subong nga Sabado kag Domingo.
Ini matapos nga isa pa ka ginaalegar nga katapo sang 3rd Platoon sang Southwest Front sang New People’s Army ang napatay sa engkwentro sa tunga nila sang 15th Infantry Battalion nga nagapatigayon sang Mobile Community Support Sustainment Operation sa Sitio Bajay, Barangay Caliling, banwa sang Cauayan alas 3:00 ang takna kahapon sang hapon, Mayo 21.
Nahibaluan nga may lima nga nagkalamatay sa mga engkwentro sa Sitio Napulian kag Sitio Oway Oway sa Barangay Quintin Remo, banwa sang Moises Padilla sang Sabado samtang apat naman ang napatay sa ilinaway sa Sitio Cambawgon, Barangay Trinidad, ciudad sang Guihulngan, Negros Oriental kahapon sang kaagahon.
Sa interview sang Bombo Radyo Bacolod kay 62nd Infantry Battalion commander Lt. Col. William Pesase, nagapabilin sa Nalagon Funeral Homes sa banwa sang Moises Padilla kag may yara na sila sang identity kun sa diin ginkilala man sa mga anay rebelde nga nagbalik na sabak sang gobyerno apang indi pa mahatag sa publiko bangud hulaton pa ang pamilya mismo ang magclaim sang bangkay kag magkilala diri kasubong man mahatagan sang nagakaigo nga paglubong.
May mga recoveries man sa encounter sites nga mga high-powered fire arms kag iban pa.
Nagapakig-unong man ang mga ini sa mga pamilya sang napatay sa magkatuhay nga engkwentro nga nagluntad sa tunga sang tropa sang gobyerno kag mga New People’s Army.
Nagpanugyan man si Pesase sa mga nabilin nga mga katapo sang New Peoples Army nga magsurrender na kag magbalik sa sabak sang gobyerno agud nga malikawan nga mapatay sa engkwentro ukon madakpan sang tropa sang gobyerno kag mapriso.
