Indi pa makabalik sa klase ang apat ka mga eskwelahan sa Negros Occidental nga nahamtang sa sulod sang 6 kilometers Extended Danger Zone sang Bulkan Kanlaon.
Sa interview sang Bombo Radyo Bacolod kay Ian Arnold Arnaez, Public Information Officer sang Department of Education-Division of Negros Occidental, ang mga estudyante nga nagaeskwela sa mga eskwelahan nga indi pa mabalikan ang ginpangitaan nalang sang temporary learning spaces kun sa diin ang mga ini gin-evacuate.
Suno kay Arnaez, ang Office of the Civil Defense kag iban nga partners ang magabutang man sang canopy type nga temporary learning spaces sang mga kabataan magluwas sa ginbutang sang DepEd.
Suno diri ang temporaryo nga klasehan ang ginsiguro nga convenient kag comfortable man sa mga estudyante kag masiguro nga ang klase nga face to face ang 5 days.
Ginpahayag man sini nga ang mga estudyante ang didto gihapon nagpaenrol sa eskwelahan nga nasulod sa 6 kilometers Extended Danger Zone sang Bulkan Kanlaon apang klasehan lamang sila sa eskwelahan kun sa diin ang mga ini gin-evacuate.
