Apat ka explosive detection dogs ang gindeploy sa pagtsekyar sa festival sites sang Masskara Festival sa ciudad sang Bacolod.
Sa interview sang Bombo Radyo kay Bacolod City Explosive Ordnance Disposal (EOD) and Canine Unit head Police Cpt Jester Minguez, duha ka sniffer dog ang nagikan sa EOD and Canine Unit sang Negros Occidental Provincial Police Office kag duha man ang naggikan sa Bacolod City EOD and Canine Unit.
Suno diri, humalin sa pag-umpisa sang Masskara Festival, adlaw-adlaw ginadeploy ang apat ka ido nga nagalibot sang tag-duha ka oras sa mga festival sites antes ang mga events.
Suno kay Minguez, ang ido nga naggikan sa NOCPPO ang ginadeploy sa MegaWorld Uppereast kag Bacolod City Government Center samtang ang duha naman gikan sa BCPO ang para sa Bacolod City Public Plaza kag Lacson St.
Pahayag sini, nakaligad nga duha ka adlaw nagtawag sa ila opisina si Police Major Elmer Bonilla, station commander sang Bacolod Police Station 1 angot sa isa ka bag nga ginbilin malapit sa La Consolacion College Bacolod apang ini ang naclaim man sang tag-iya.
Mahimo sang mga ido magdetect sang mga explosives kaangay sang mga granada, improvised explosive device kag iban pa apang ang mga ido ang indi makadetect sang illegal nga druga bangod may yara sang mga narcotics detection canine nga ginagamit para diri.
