Luwas nga nakabalik sa Pilipinas ang apat ka mga Filipino crewmen matapos gin-atake sang Houthi rebels ang barko sang mga ini sa Red Sea subong nga bulan.
Suno sa Department of Migrant Workers (DMW), nag-abot sa Ninoy Aquino International Airport Terminal 3 ang apat ka crewmen sang M/V Minoan Courage sang Domingo.
Sila ang ikaduha nga batch sang 21 ka mga Filipinos nga natalana para sa repatriation matapos nga gin-atake sang Houthi rebels ang ila vesel samtang nagabyahe sa Red Sea sang Oktubre 1.
Ang una nga batch nga ginalakipan sang pito ka mga seafarers ang nag-abot sang pungsod sang Oktubre 9 samtang ang nabilin nga napulo ka mga seafarers ang ginalauman nga makapauli sa malapit nga tinion.
Ang nag-abot nga mga crewmen ang magabaton sang assistance nagikan sa DMW kag Overseas Workers Welfare Administration (OWWA) kag magapaidalum sa psychiatric evaluations.
