Palaligban pa para sa mga pumuluyo sa Barangay Basak, Cauayan, Negros Occidental kun ano ang nagpatay sa ginasagod nila nga kanding sang tinalikdan nga gab-i kun sa diin ginsuyop ang ila dugo.
Sa interview sang Bombo Radyo sa nagasagod sang kanding nga si Evance Gestoso, apat ka kanding niya ang ginpatay sang Domingo sang gab-i kag Lunes sang kaagahon na natukiban nga nagahigda sa tunga sang talamnan kag wala na sang kabuhi.
Halos katunga nalang sang lawas sang nagabusong nga kanding ang nabilin kag wala naman ini sang dugo, samtang ang iban ang may dalagko nga pilas kag may mga karos pa sa likod.
Suno kay Gestoso, nabatyagan sang pumuluyo malapit sa ginalawigan sang kanding nga naghuni ang mga ini kag pagka-kaagahon, nasapwan nga patay na.
Indi naman ini magpati nga ido ang nagkagat sa mga sapat bangud dalagko ang unto sini.
Suno kay Gestoso, indi kinaandan nga sapat ang nag-atake sa mga kanding.
Sang Martes sang kaagahon, duha ka baboy naman ang gin-atake sa amo man nga barangay.
