Natalana kuntani nga i-turnover sang nagtaliwan nga si Department of Public Works and Highways (DPWH) Undersecretary Maria Catalina Cabral ang anum ka karton nga dokumento nga nagapamatuod nga wala siya sang kahilabtanan sa maanomaliya nga flood control projects.
Suno sa iya abogado nga si Mae Divinagracia, ihatag kuntani sa iya ni Cabral ang mga nasambit nga dokumento apang wala ini madayon kag indi na sa karon matumod kon diin na ang mga papel.
Madumduman nga sa Senate blue ribbon committee hearing sang nagligad nga tuig, gintudlo ni ex-DPWH Undersecretary Roberto Bernardo si Cabral bilang mastermind sa kickback scheme sa ahensya.
Suno kay Bernardo nga si Cabral ang may gahum nga magdugang, magpasulod, ukon magpakakas sang mga proyekto nga ginpundohan sa idalom sang National Expenditure Program.
Panindugan sang abogado sang nagtaliwan nga opisyal nga wala nakabaton sang kickback ang iya kliyente kag nagapangabuhi lang ini sang simple sa iya balay sa Quezon City kaupod ang iya pamilya.
Dugang pa sini nga nakahanda man kuntani si Cabral nga mag-atubang sa Independent Commission for Infrastructure (ICI) hearing angot sa flood control controversy apang wala ini nakabaton sang imbitasyon.
