Narecover sa mag-utod kag duha nila ka pakaisa ang masobra P2.3 million nga balor sang suspected shabu sa Purok Himaya, Brgy Mansilingan, Bacolod City.
Ang operasyon ang ginpatigayon sang Bacolod City Police Office – City Drug Enforcement Unit (BCPO-CDEU) alas-4:40 kaina sang kaagahon.
Ang mga suspect ang ginkilala nga sanday Junjie Alila, 36 anyos; John Mark Alila, 23 anyos; Jesus Perez, 32 anyos kag Jezelle Ann Braba, 29 anyos lunsay wala sang trabaho kag residente sa nasambitan nga lugar.
Sa interview sang Bombo Radyo Bacolod kay CDEU Head Police Lt Col Antonio Benitez Jr. madugay na nga yara sa ila watchlist ang mga suspect tubtob nga sila ang nakabatun sang impormasyon nga may manug-abot nga drug items.
Kapin isa ka bulan man ang ila nga surveillance kag monitoring antes napatigayon ang buybust.
Narecover sa apat ang duha ka knot tied plastic bags kag siyam ka medium heat sealed plastic sachet sang suspected shabu kalakip na ang buybust item.
Ang narecover nga suspected shabu ang ginabanta nagabug-at sang 360 gramos kag may standard drug price nga P2,380,000.
Suno kay Benitez, isa sa mga suspect ang may record nga kaso sang murder samtang ginatsekyar pa nila kun may mga record man ang iban pa.
May gintuad man ang mga ini nga bodega, nga isa sa tutukan sang mga kapulisan.
Suno kay Benitez, gikan sa Manila ang mga supply kag may-ara sang anay priso nga amo ang nagafacilitate sang pagpasulod sang droga sa ciudad.
Ginapasalamatan sini ang mga naghatag sang impormasyon nga nagresulta sa pagka-aresto sang apat kag mapunggan nga magdangat pa sa mga Barangay ang illegal nga droga.
Ginpasalamatan man sini ang effort sang mga kapulisan nga nagpatigayon sang operasyon.
Tinguhaan sang mga ini nga ma-inquest ang apat subong nga adlaw sa kaso nga paglapas sa Republic Act 9165 ukon Comprehensive Dangerous Drugs Act of 2002.
