Nagapangatubang na sang kaso nga paglapas sa RA 9165 ukon Comprehensive Dangerous Drugs Act of 2002 ang apat ka mga persona sa probinsya sang Negros Occidental matapos madakpan sa magkatuhay nga buybust operation.
Dakop ang street level individual (SLI) sa syudad sang Silay sa buybust operation nga ginpatigayon sa Purok Gomez, Barangay 2 sa nasambit nga syudad.
Ginkilala ang suspetsado kay Roderick Chavez, 38 anyos kag residente sang Purok Paghidaet, Barangay Mambulac, Silay City.
Nakuha sa paghinakop sini ang walo ka heat sealed transparent sachet sang suspected shabu kalakip na ang buybust item, P3500 buybust money, P20 nga cash proceeds kag iban pa nga drug paraphernalia.
Ginabanta nga nagabug-at sang pito ka gramos ang shabu kag nagabalor sang P47,000.
Samtang sa syudad naman sang Himamaylan, dakop man ang tatlo ka mga persona sa buybust operation sang Himamaylan City Police Station sa MG Bigcaya, Brgy. Suay, Himamaylan City.
Ginkilala ang mga suspetsado kanday Jayson Villanueva, 22 anyos ; Lendon Mahinay, 19 anyos kag Chris Mark Quina, 21 anyos.
Nakuha sa paghinakop nila ang anum ka mga heat sealed sachet sang suspected shabu nga nagabug-at sang lima ka gramos kag nagabalor sang P85 mil.
Dugang nga nakuha sa iya ang P500 cash kag iban pa nga drug paraphernalia.
Nakahunong na sa karun sa Himamaylan City Police Station ang mga suspetsado.
