Arestado ang apat ka mga babaye nga nadakpan nga nagapangawat sa isa ka grocery store sa ciudad sang Silay.
Sa interview sang Bombo Radyo kay Police Lt. Col. Robert Petate, hepe sang Silay City Police Station, nadakpan nga nagashoplifting sa Savemore, Rizal Highway, Barangay 4, Silay City sanday Anna Marie Sales, 35-anyos; Jennie Frugalidad, 49-anyos; Rhea Baluca, 36-anyos; kag Josie Narcisso, 43-anyos.
Suno kay Petate, lunsay mga residente sang Barangay Bata, Bacolod City ang mga suspetsado.
Magwa na kuntani ang mga ini sa grocery store bitbit ang assorted goods nga nagabalor kapin P17,000 sang sila ang nadakpan sang security guard.
Nalakip sa mga assorted goods ang mga balanyos kag lotion batok sa lamok.
Sa karun nakahunong ang mga ini sa Silay City Police Station kag igapaidalum sa inquest proceedings kun may record sang pagpangawat sa mga kaingod nga munisipalidad.
