Apat ka mga balay ang totally damaged kag isa ang partially damaged nga nagluntad sa isa ka compound sa Barangay 3, Kabankalan City kahapon sang udto.
Sa interview sang Bombo Radyo kay Fire Inspector Harry Fernandez, fire marshal sang Kabankalan City Fire Station, wala sila sang may nabaton nga fire call kag nagwa lamang ini sa ila estasyon sang may nakit-an ini nga maitom nga aso sa bahin sang Barangay 3.
Bangud diri, ila gilayon nga ginpagwa ang duha ka fire truck kag ginrespondehan ang sunog.
Suno kay Fernandez, isa ka compound ang lugar kun sa diin apat ka mga magparientehanay ang nagaistar samtang may isa pa gid ka balay nga malapit diri.
Nagresponde sila alas 11:09 sang aga kag napalong alas 12:41 sang udto.
Suno sa iya, ang kalayo ang nagikan sa ikaduha nga panalgan sang balay ni Marilou Hernando, kun sa diin may yara sang nagaboard.
Ginalantaw snag BFP nga kuryente ang gintunaan sang kalayo.
Suno sa fire marshall, nangin madasig ang paglapta sang kalayo kag nagdangat sa second alarm ang sunog kun sa diin nagbulig man ang BFP-Ilog.
Suno diri, kapin P1.2 million ang balor sang halit sang sunog samtang wala naman sang may napilasan ukon nasamaran.
Nagpanugyan ini sa mga pumuluyo nga mangin vigilante kag tsekyaron gid ang ila mga puluy-an agud malikawan ang kaangay nga mga insidente.
