Ginkompirmar sang City Administrator sang ciudad sang Talisay nga nakacontact sa nurse nga nauna na nga nagpositibo sa COVID-19 ang apat ka mga bikers nga nagdugang sa kaso sang virus sa ciudad kahapon.
Sa interview sang Bombo Radyo kay Atty. Jonathan Ealdama, ginpahayag sini nga 15 ka mga bikers ang ila nga ginquarantine bangud nakacontact ang mga ini sa isa ka nurse nga nauna na nga nagpositibo sa virus kun sa diin 10 diri ang nagnegatibo, apat ang nagpositibo kag isa ang gina-rerun pa sa molecular laboratory sa Teresita Lopez Jalandoni Provincial Hospital ang resulta.
Suno kay Ealdama, posible nga biker man ang nasambit nga frontliner.
Suno diri, nagapadayon pa ang ila nga contact tracing sa mga nakahalubilo sang apat ka mga bikers kag gina-close monitor sa karun ang ila mga panimalay.
Bangud nga indi man ikit-ikit ang sitwasyon sang ila mga puluy-an, ang mga balay lang ang ginpaidalum sa lockdown.
Nagapangabay man ang city administrator sang kooperasyon sang mga pumuluyo kag nagpang-abiso nga indi magkabalaka bangud gina-ubra man sang local government ang ila masarangan agud maprotektahan ang mga pumuluyo.
Gindugang man ni Ealdama nga nagpagwa sang executive order si Mayor Neil Lizares nga nagadumili sa pagpatigayon sang mga aktibidad nga may pagtililipon kalakip na ang biking, hiking kag mga sports.
Gindula man sini ang kahangawa sang mga residente kadungan sang pagkompirmar nga naquarantine sa karun ang iloy, amay kag utod nga isa ka tuig sang apat ka tuig nga bata nga nagikan sa Guimaras kag Iloilo nga nagpositibo man sa COVID-19.
Suno kay Ealdama, bangud nga naga-ikit-ikit ang mga panimalay kun sa diin nagapuyo ang pasyente, ginpaidalum ang bilog nga purok sa lockdown.
Suno sa iya, nagahatag man sila sang food assistance sa pamilya samtang nakaquarantine ang mga ini.
