Nakilal-an na ang apat ka mga suspetsado nga nanghold-up sa tatlo ka mga construction worker sa ginakay-o nga gasoline station sa Purok San Jose 2, Barangay Sum-ag, Bacolod City alas-2:45 sang Huwebes sang kaagahon.
Sa interview sang Bombo Radyo Bacolod kay Police Captain Michael Tuburan, hepe sang Bacolod Police Station 9, matapos nga makit-an sa Medayna Street, Barangay Bata ang salakyan nga Toyota Innova nga nagaduag sang itom nga gingamit sang mga suspetsado, na-trace ang tag-iya sini.
Suno diri, residente sa ciudad sang Bago ang tag-iya kag ang salakyan ang iya ginaparentahan kag ang renter ang isa ka babayi nga nangin suki naman sini.
Suno kay Tuburan, ang manghod nga lalaki sang renter ang naggamit sang salakyan kaupod ang tatlo ka iban pa.
Nakilal-an ang apat ka mga suspetsado paagi man sa ila nga social media account.
Samtang, ginalantaw naman nga ini man ang mga suspetsado nga nanghold-up sa mag-asawa sa Tomaro Road Purok Kabugwason Barangay Cabug, ciudad sang Bacolod sang Marso 12, matapos nga nagsanto sa adlaw sang pag-rent sang salakyan ang adlaw man nga natabo ang pagpanghold-up, apang padayon pa ang imbestigasyon bangod santo sa mag-asawa Maroon ang Innova nga ginasakyan sang naghold-up sa ila.
