Apat ka mga tigulang nga babayi ang patay samtang pilason naman ang suspetsado matapos gin-arado sang Isuzu D-MAX ang kapehan sa Barangay Bae, Jimalalud, Negros Oriental kahapon.
Sa impormasyon nga nakuha sang Bombo Radyo nagikan sa Negros Oriental Police Office, ginapahayag nga nag-overtake ang pick up sa van apang nadulaan sang kontrol ang driver nga si Robert Lim, 62 anyos kag residente sang Barangay North Poblacion, Jimalalud, Negros Oriental gani nabungguan sini ang apat ka mga tigulang nga nagapangape sa higad sang dalan sa tupad sang isa ka tiyange kag nagtupa sa kanal.
Ginkilala ang mga biktima kanday Lydia Garsula, 80 anyos, residente sang Brgy. Panglayaan, Jimalalud; Herminilda Gantalao, 76 anyos, residente sang Brgy. Tamao, Jimalalud,; Milagros Garsula, 82 anyos, residente sang Brgy. Bae, Jimalalud; kag Remedios Gabillar, 65 anyos kag residente sang Brgy. Panglayaan, Jimalalud, Negros Oriental.
Ang duha ka biktima ang ginhingagaw dala sa Jimalalud Rural Health Unit samtang ang duha ang gindala sa Guihulngan City District Hospital apang lunsay gindeklarar nga wala na sang kabuhi.
Samtang, ang driver ang gindala sa ACE Medical Doctors sa Daro, Dumaguete City.
