Ginbatak na sang Inter-Agency Task Force against coronavirus disease sa ciudad sang Bacolod ang deklarasyon bilang ultra risk areas sa apat ka mga lugar.
Ini ang kasunod sang pag-negatibo sa confirmatory test sang lima ka mga pasyente sa balatian.
Sa interview sang Bombo Radyo Bacolod kay Vice Mayor El Cid Familiaran, chairman sang IATF againts COVID-19 sa ciudad, ginpahayag sini nga gin-lift na nila ang deklarasyon bilang ultra risk areas sa JR Torres Subdivision sa BarangaySingcang-Airport, Eroreco Subdivision sa Barangay Mandalagan, Rosario Heights Subdivison sa Barangay Taculing kag Purok Banaue sa Barangay Villamonte.
Suno kay Familiaran, apisar nga indi na makabig nga ultra risk areas ang ini nga mga lugar, nagapanugyan ini sa gihapon sa pumuluyo nga likawan ang paggwa sa mga puluy-an agud nga indi na maglapta ang virus.
Sa karon nagapabilin nga mga ultra risk areas sa ciudad amo ang Doña Juliana Subdivision sa Barangay Taculing, Purok Sabes sa Barangay Villamonte, Purok Bulak sa Barangay Mandalagan kag Purok Bayanihan sa Barangay Banago.
