Na-rescue ang apat ka mag-utod nga menor de edad matapos nga gingamit sa Cybersex sang ila mga ginikanan sa Purok Tumpok, Espinos Village 2, Brgy. Taculing, Bacolod City, Negros Occidental sang Biyernes, Hulyo 14.
Ang mag-asawa nga suspetsado amo sanday, Mary Rose Maribao Campaner, 28 anyos kag Romy Librando Ligid Ligid, 35 anyos, residente sang nasambit nga lugar.
Samtang ang mga biktima naman amo ang apat nila ka ka kabataan; siyam ka tuig nga babayi, anum ka tuig nga lalaki kag duha ka tuig nga babayi kag lalaki nga kapid.
Sa interview sang Bombo Radyo kay Police Captain Christine Cerbo Officer In Charge sang City Women and Children Protection Desk, sila nakabaton sang koordinasyon gikan sa Women and Children Protection Center – Visayas Field Unit (WCPC-VFU) angot sa pagserbe sang Search Warrant kag entrapment operation nga I-conduct sa Brgy. Taculing, Bacolod City.
Suno diri, sila nag-conduct sang final briefing sa Police Station 6 kaupod ang Department of Social Welfare and Development, Department of Social Services and Development, Department of Justice, kag Philippine National Police sa pagdesignate sang ila task.
Ang PNP ang nag-secure sang area, samtang ang DSWD, DSSD kag ang WCD naman ang magasecure sa mga kabataan sa pagserbe sang Search Warrant, Seize and Examine Computer Data (WSSECD) kag entrapment operation.
Ang mga kabataan ang gingamit sang mga ginikanan sa Online Sexual Exploitation of Children ukon cybersex kun sa diin ginapakita ang pribado nga bahin sang lawas sang isa ka persona agud makakwarta.
Samtang, aminado man si Cerbo nga ginkakibot sini ang insidente bangod sa ciudad ang Violence against Women and Children nga insidente ang masami nga magluntad.
Nagpanawagan ini sa mga pumuluyo sang Bacolod nga indi magkahadlok magsugid kag magpalapit sa kapulisan agud sila ma-assist kag mabuligan.
Sa karun ang mag-asawa ang yara sa kustodiya sang Bacolod Police Station 6
